Nova Vulgata72 72,1Salomonis. Deus, iudicium tuum regi da et iustitiam tuam filio regis;
Nova Vulgata 72,2iudicet populum tuum in iustitia et pauperes tuos in iudicio.
Nova Vulgata 72,3Afferant montes pacem populo, et colles iustitiam.
Nova Vulgata 72,4Iudicabit pauperes populi et salvos faciet filios inopis et humiliabit calumniatorem.
Nova Vulgata 72,5Et permanebit cum sole et ante lunam, in generatione et generationem.
Nova Vulgata 72,6Descendet sicut pluvia in gramen et sicut imber irrigans terram.
Nova Vulgata 72,7Florebit in diebus eius iustitia et abundantia pacis, donec auferatur luna.
Nova Vulgata 72,8Et dominabitur a mari usque ad mare et a flumine usque ad terminos orbis terrarum.
Nova Vulgata 72,9Coram illo procident incolae deserti, et inimici eius terram lingent.
Nova Vulgata 72,10Reges Tharsis et insulae munera offerent, reges Arabum et Saba dona adducent.
Nova Vulgata 72,11Et adorabunt eum omnes reges, omnes gentes servient ei.
Nova Vulgata 72,12Quia liberabit inopem clamantem et pauperem, cui non erat adiutor.
Nova Vulgata 72,13Parcet pauperi et inopi et animas pauperum salvas faciet.
Nova Vulgata 72,14Ex oppressione et violentia redimet animas eorum, et pretiosus erit sanguis eorum coram illo.
Nova Vulgata 72,15Et vivet, et dabitur ei de auro Arabiae, et orabunt pro ipso semper; tota die benedicent ei.
Nova Vulgata 72,16Et erit ubertas frumenti in terra, in summis montium fluctuabit, sicut Libanus fructus eius; et florebunt de civitate sicut fenum terrae.
Nova Vulgata 72,17Sit nomen eius benedictum in saecula, ante solem permanebit nomen eius. Et benedicentur in ipso omnes tribus terrae, omnes gentes magnificabunt eum.
Nova Vulgata 72,18Benedictus Dominus Deus, Deus Israel, qui facit mirabilia solus.
Nova Vulgata 72,19Et benedictum nomen maiestatis eius in aeternum; et replebitur maiestate eius omnis terra. Fiat, fiat.